Torna alla pagina filologica

Inviate i vostri commenti

 
CLAVDIANI


Carmina minora 33 - 39

 

   
33. DE CRYSTALLO
      CVI AQVA INERAT
   
         
    Possedit glacies naturae signa prioris    
        et fit parte lapis, frigora parte negat.    
    Sollers lusit hiemps, inperfectoque rigore    
        nobilior vivis gemma tumescit aquis.

   
   
34. DE EODEM
   
         
    Lymphae, quae tegitis cognato carcere lymphas,    
        et quae nunc estis quaeque fuistis aquae,    
    quod vos ingenium vinxit? Qua frigoris arte    
        torpuit et maduit prodigiosa silex?    
           5 Quis tepor inclusus securas vindicat undas?    
        Interior glacies quo liquefacta Noto?    
    Gemma quibus claustris arcano mobilis aestu    
        vel concreta fuit vel resoluta gelu?

   
   
35. DE EODEM
   
         
    Solibus indomitum glacies Alpina rigorem    
        sumebat nimio iam pretiosa gelu    
    nec potuit toto mentiri corpore gemmam,    
        sed medio mansit proditor orbe latex.    
           5 Auctus honos; liquidi crescunt miracula saxi,    
        et conservatae plus meruistis aquae.

   
   
36. DE EODEM
   
         
    Aspice porrectam splendenti fragmine venam,    
        qua trahitur limes lucidiore gelu.    
    Hic nullum Borean nec brumam sentit opacus    
        umor, sed varias itque reditque vias.    
           5 Non illum constrinxit hiems, non Sirius hausit,    
        aetatis spatium non tenuavit edax.    
         
   
37. DE EODEM
   
         
    Clauditur immunis convexo tegmine rivus    
        duratisque vagus fons operitur aquis.    
    Nonne vides propriis ut spumet gemma lacunis    
        et refluos ducant pocula viva sinus    
           5 udaque pingatur radiis obstantibus Iris,    
        secretas hiemes sollicitante die?    
    Mira silex mirusque latex! Et flumina vincit    
        et lapides merito, quod fluit et lapis est.

   
   
38. DE EODEM
   
         
    Dum crystalla puer contingere lucida gaudet    
        et gelidum tenero pollice versat onus,    
    vidit perspicuo deprensas marmore lymphas,    
        dura quibus solis parcere novit hiems,    
           5 et siccum relegens labris sitientibus orbem    
        inrita quaesitis oscula fixit aquis.

   
   
39. DE EODEM
   
         
    Marmoreum ne sperne globum: spectacula transit    
        regia nec rubro vilior iste mari.    
    Informis glacies, saxum rude, nulla figurae    
        gratia, sed raras inter habetur opes.