 |
|
 |
 |
 |
|
|
|
|
|
|
|
|
|
|
|
| Felix qui Pharias proscindit vomere terras: |
||||
| nubila non sperat tenebris condentia caelum | ||||
| nec graviter flantes pluviali frigore Coros | ||||
| invocat aut arcum variata luce rubentem. | ||||
| 5 | Aegyptos sine nube ferax imbresque serenos | |||
| sola tenet: secura poli, non indiga venti | ||||
| gaudet aquis quas ipsa vehit Niloque redundat, | ||||
| qui rapido tractu mediis elatus ab Austris, | ||||
| flammigerae patiens zonae Cancrique calentis, | ||||
| 10 | fluctibus ignotis nostrum procurrit in orbem | |||
| secreto de fonte cadens, qui semper inani | ||||
| quaerendus ratione latet, nec contigit ulli | ||||
| hoc vidisse caput: fertur sine teste creatus, | ||||
| flumina profundens alieni conscia caeli. | ||||
| 15 | Inde vago lapsu Libyam dispersus in omnem | |||
| Aethiopum per mille ruit nigrantia regna | ||||
| et loca continuo solis damnata vapore | ||||
| inrorat populisque salus sitientibus errat | ||||
| per Meroen Blemyasque feros atramque Syenen. | ||||
| 20 | Hunc bibit infrenis Garamans domitorque ferarum | |||
| Girraeus, qui vasta colit sub rupibus antra, | ||||
| qui ramos hebeni, dentes qui vellit eburnos, | ||||
| et gens conpositis crinem vallata sagittis. | ||||
| Nec vero similes causas crescentibus undis | ||||
| 25 | aut tempus meruit: glacie non ille soluta | |||
| nec circumfuso scopulis exuberat imbre, | ||||
| nam cum tristis hiems alias produxerit undas, | ||||
| tum Nilum retinent ripae; cum languida cessant | ||||
| flumina, tum Nilus mutato iure tumescit. | ||||
| 30 | quippe, quod ex omni fluvio spoliaverit aestas, | |||
| hoc Nilo natura refert, totumque per orbem | ||||
| collectae partes unum revocantur in amnem; | ||||
| quoque die Titana Canis flagrantior armat | ||||
| et rapit umores † madidos † venasque calore | ||||
| 35 | conpescit radiisque potentibus aestuat axis, | |||
| Nilo bruma venit, contraria tempora mundo. | ||||
| Defectis solitum referens cultoribus aequor | ||||
| effluit Aegaeo stagnantior, acrior alto | ||||
| Ionio seseque patentibus explicat arvis. | ||||
| 40 | fluctuat omnis ager; remis sonuere novales; | |||
| saepius, aestivo iaceat cum forte sopore, | ||||
| cernit cum stabulis armenta natantia
pastor.
|
||||
|
|
|
|